काठमाडौं । एकदिवसीय विश्वकपमा आज शनिबार दुई खेल हुँदैछन ।
पहिलो खेलमा बंगलादेश र अफगानिस्तान धर्मशालामा र अर्को खेलमा दक्षिण अफ्रिका र श्रीलंका दिल्लीमा भीड्नेछन् । पहिलो खेल धर्मशालामा शुरु भएको छ । अफगानिस्तानले टस हारेर ब्याटिङ गरिरहेको छ ।
अफगानिस्तान आईसीसी विश्वकपमा बंगलादेशविरुद्ध पहिलो जित दर्ता गर्ने लक्ष्यमा हुनेछ । एक महिना अघि भएको एसिया कपमा बंगलादेशले अफगानिस्तानलाई हराएको थियो । अफगानिस्तान तेस्रो पटक विश्वकप खेल्दैछ । उसले पहिलो पटक सन् २०१५ मा डेब्यु गरेको थियो ।
अर्को खेलमा सवा दुई बजे श्रीलंका र दक्षिण अफ्रिका भीड्नेछन । श्रीलंका भर्खरै सम्पन्न एसिया कपको उपविजेता टोली हो । साउथ अफ्रिकाले भने अष्ट्रेलियाविरुद्धको सिरिज जितेको थियो ।
दुवै टिमले ८० एकदिवसीय खेलमा प्रतिस्पर्धा गरेका छन् । जसमा साउथ अफ्रिका ४५ र श्रीलंका ३३ खेलमा विजयी भएको छ । श्रीलंका सन् १९९६ को विश्वकप विजेता हो भने दक्षिण अफ्रिकाले अहिलेसम्म जितेको छैन । यो टिम राम्रो हुँदा हुँदै पनि अभागी टिमका रुपमा चिनिन्छ ।