काठमाडौं । सत्तारुढ प्रमुख तीन दलले ११ देशमा नियुक्त हुने राजदूतमा भागबण्डा गरेका छन् ।
बिहीबार सिंहदरबारमा भएको छलफलमा प्रधानमन्त्री पुष्पकमल दाहाल प्रचण्ड, नेकपा एमालेका अध्यक्ष केपी शर्मा ओली र राष्ट्रिय स्वतन्त्र पार्टीका सभापति एवम् उपप्रधानमन्त्री रवि लामिछानेबिच राजदूतमा भागबण्डाको सहमति भएको हो ।
स्रोतका अनुसार एमालेले आठ, रास्वपाले दुई र नेकपा माओवादी केन्द्रले एक देशको राजदूत पाउने सहमति भएको छ । प्रधानमन्त्री प्रचण्डले गठबन्धन बलियो बनाएर सत्ता जोगाउन आप्नो पार्टीका लागि एक सिटमा मात्रै चित्त बुझाएका छन् ।
गत २४ जेठमा मन्त्रिपरिषद् बैठकले भारत, अमेरिका, बेलायत, साउदी अरेबिया, दक्षिण कोरिया, मलेसिया, स्पेन, डेनमार्क, इजरायल, कतार र पोर्चुगल गरी ११ देशको राजदूत फिर्ता बोलाएपछि ती पद रिक्त छन् ।
रास्वपाले अमेरिका र भारत मध्ये एकको राजदूत माग गरेपनि एमाले र माओवादी सहमत नभएको बताइएको छ । रास्वपाले बेलायतको राजदूत पाउन सक्नेछ ।
