काठमाडौं । प्रतिनिधिसभा बैठकमा सत्तारुढ नेकपा एमाले र प्रतिपक्षी नेपाली कांग्रेसका सांसदहरूबीच धकेलाधकेल भएको छ ।
सभामुख देवराज घिमिरेले नेपाली कांग्रेसको नाराबाजीका बीच गृहमन्त्री रवि लामिछानेलाई बोल्न समय दिएपछि दुबै पक्षका सांसदहरू विवादमा उत्रिएका हुन् ।
सभामुखले गृहमन्त्रीलाई समय दिएपछि कांग्रेसका सांसदहरूले बेल घेराउ गरेपछि सत्तारुढ सांसदहरु उठेर गृहमन्त्रीलाई बोल्न दिनुपर्ने माग गर्दा विवाद बढेको हो ।
कांग्रेस सांसदहरू गृहमन्त्री रोष्ट्रम जाने बाटो छेक्न उनको कुर्सी नजिकै पुगेर नाराबाजी गर्न थालेका थिए । त्यही बेला नेकपा एमालेका अध्यक्ष केपी शर्मा ओली र अरु सांसदहरुले लामिछानेलाई रोष्ट्रममा जान आग्रह गरे ।
त्यस क्रममा एमालेका सांसदहरु पनि वेलमा आएर कांग्रेस सांसदहरुसँग धकेलाधकेल गर्दै गृहमन्त्रीलाई रोष्ट्रम जाने बाटो खाली गराउन खोजेका थिए ।
त्यसपछि सभामुख घिमिरेले गृहमन्त्री लामिछानेलाई आसन ग्रहण गर्न आग्रह गरे र संसद बैठक अवरुद्ध गरे ।