काठमाडौं । इलाम र बझाङमा भएको उपचुनावमा नेकपा एमाले र नेपाली कांग्रेस नै मुख्यमन्त्री प्रतिस्पर्धी देखिएका छन् । नेकपा माओवादी, नयाँ शक्तिका रुपमा देखिएको राष्टिय स्वतन्त्र पार्टी र स्वतन्त्र उम्मदेवार निकै कमजोर देखिएका छन् । दुवै ठाउँमा एमाले र कांग्रेस मध्ये एकले नै जित्ने देखिएको छ ।
फाकफोकथुम गाउँपालिकाका सबै ७ वडाको मत गणना सकिँदा नेकपा एमालेका सुहाङ नेम्वाङले अग्रता कायमै राखेका छन् ।
निर्वाचन अधिकृतको कार्यालयले सार्वजनिक गरेको मत परिणाम अनुसार एमालेका सुहाङले ४४१३ भोट ल्याउँदा कांग्रेसका डम्बर खड्का ३२५८ मतले पछ्याइरहेका छन् । दुईजनाबीच ११५५ मतको अन्तर छ ।
स्वततन्त्र उम्मेदवार डकिन्द्र थेगिम ९६३ भोटका साथ तेस्रो स्थानमा छन् । चौथो स्थानमा रहेका रास्वपाका मिलन लिम्बूको ६४५ भोट छ ।
बझाङ १ क को प्रदेशसभाका लागि भएको उपनिर्वाचनमा पनि नेकपा एमालेका दमनबहादुर भण्डारीले निरन्तर अग्रता लिएका छन् । यो समाचार तयार पार्दासम्म उनले ६०० भन्दा बढी मतको अग्रता बनाएका छन् ।
खप्तडछान्ना र छबिसपाथिभेरा गाउँपालिकासहित थलारा गाउँपालिका वडा नम्बर ९ को मतगणना सम्पन्न हुँदा एमालेका दमन भण्डारीले ३ हजार ७४८, नेपाली कांग्रेसका अभिषेकबहादुर सिंहले ३ हजार १ सय ८२, माओवादी केन्द्रका जनक बुढाले २ हजार ६, समाजवादीका दिलबहादुर सिंहले १ हजार १४०, राप्रपाका किशोर खड्काले ८५ मत पाएका छन् ।
गणना भएका १० हजार ४८९ मतमध्ये ३ हजार ७४८ भण्डारीले पाउँदा कांग्रेसका सिंहले ३ हजार १ सय ८२ मत मात्र पाए । मुख्य प्रतिस्पर्धी एमाले र कांग्रेसबीचको मतान्तार ५६६ मत छ ।
